Goruchwyliwr Gwaith Galwedigaethol

Mae Lewis Mallett yn Rheolwr Safle Cynorthwyol yn Kier Construction

Beth mae eich rôl yn ei gynnwys?

Mae fy rôl yn cynnwys rhoi hyfforddiant sefydlu, sesiynau briffio dyddiol, cynnal cyfarfodydd diogelwch, rheoli isgontractwyr, delio ag ymholiadau a phroblemau, archebu deunyddiau a rheoli iechyd a diogelwch mewn amryw o ffyrdd.

Beth rydych yn ei fwynhau am eich swydd?

Rwy'n mwynhau cwrdd â phobl newydd, goresgyn problemau a throsglwyddo'r gwaith i gleient hapus ar y diwedd.

Sut beth yw eich diwrnod arferol?

Rwy'n dechrau ar y safle am 7am ac fel arfer nid wyf yn gorffen tan 6pm; weithiau gall fod yn hwyrach, yn dibynnu ar y prosiect rwy'n gweithio arno. Rwy'n gweithio o ddydd Llun i ddydd Gwener fel arfer, ond gall fod angen gweithio ar benwythnosau ar adegau penodol o'r prosiect.

Mae'n ddiwydiant prysur iawn a gall fod yn heriol iawn ond os ydych yn mwynhau eich gwaith, nid yw hyn yn broblem. Gwaith tîm yw llawer o'r gwaith ar y safle, felly mae llawer o bobl ar gael i gydweithio â nhw a chael cymorth neu arweiniad ganddynt os bydd angen.

Pa sgiliau sydd eu hangen arnoch ar gyfer eich swydd?

Mae angen bod yn amyneddgar, cadw meddwl agored, bod yn dda am wrando a gallu meddwl ar eich traed. Mae angen sgiliau rhyngbersonol da arnoch a'r gallu i siarad â phobl mewn modd priodol. Mae hefyd angen i chi allu rheoli eich amser yn ddoeth a blaenoriaethu tasgau y mae angen i chi eu gwneud. Yn olaf, mae angen sgiliau cyfrifiadurol a synnwyr digrifwch da arnoch!

Beth oedd eich cefndir cyn dechrau yn y rôl hon?

Rwyf wedi gwneud amrywiaeth o wahanol swyddi ers gadael yr ysgol, ond cyn i mi ddechrau gweithio i Kier, bûm yn gweithio i Interserve lle roeddwn yn gweithio ar brosiect larymau yng Ngharchar Channing Woods yn Newton Abbot, Dyfnaint. Yn ffodus, roedd ffrind i'r teulu yn Rheolwr Prosiect ar y prosiect a rhoddodd gyfle i mi weithio oddi tano. Rhoddodd hyn brofiad i mi, yn ogystal â blas ar y diwydiant a wnaeth ennyn fy chwilfrydedd ymhellach ynglŷn â chael swydd yn y diwydiant adeiladu.

Beth rydych yn fwyaf balch ohono yn eich gyrfa?

Ers i mi ddechrau gweithio i Kier, rwyf wedi cyflawni cymwysterau ac wedi ennill rhai gwobrau o fewn y cwmni.

Ble rydych yn gweld eich hun ymhen 10 mlynedd?

Nid wyf yn hoffi pennu amserlenni ar gyfer pethau ond hoffwn fod yn rheoli fy mhrosiectau fy hun yn llwyddiannus i Kier.

Gair o gyngor i unrhyw un sy'n ystyried gyrfa yn y diwydiant adeiladu?

Byddwn yn argymell yn gryf i rywun gael lleoliad profiad gwaith cyn neidio i mewn i'r rôl, er mwyn i chi gael gwir syniad o'r hyn a ddisgwylir gennych. Dilynais lwybr Prentisiaeth, a oedd yn gydbwysedd da yn fy marn i, am fy mod yn hyfforddi ac yn gweithio ar yr un pryd, gan fagu profiad ar y safle ac ennill cymwysterau yn y Coleg Adeiladu Cenedlaethol yn Bircham Newton, Kings Lynn, Norfolk.