Cynllunydd

Sut i fod yn gynllunydd

Mae sawl ffordd o ddod yn gynllunydd. Gallwch ennill y cymwysterau sydd eu hangen arnoch drwy ddilyn cwrs prifysgol neu goleg, neu brentisiaeth. Os oes gennych rywfaint o brofiad yn barod, efallai y gallwch wneud cais yn uniongyrchol i fod yn gynorthwyydd cynllunio.

Dylech chi ymchwilio i’r opsiynau i weld pa un yw’r un iawn i chi.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Prifysgol

Gallech gwblhau gradd mewn rheoli adeiladu neu reoli prosiectau.

Os oes gennych chi radd gyntaf yn barod, gallech astudio am gymhwyster ôl-raddedig mewn rheoli prosiectau adeiladu.

Bydd angen y canlynol arnoch:

• 2 - 3 lefel A neu gyfwerth (cwrs gradd)
• Gradd gyntaf mewn pwnc perthnasol (cwrs ôl-radd).

• Eglurhad o'r gofynion mynediad cyfatebol
• Dod o hyd i gwrs prifysgol
• Cyngor am gyllid

Coleg/darparwyr hyfforddiant

Gallech ddilyn Diploma Estynedig Lefel 3 mewn Adeiladu a'r Amgylchedd Adeiledig neu Dystysgrif Genedlaethol Uwch (HNC) mewn Astudiaethau Adeiladu.

Bydd angen y canlynol arnoch: 

• 4 TGAU (neu gymhwyster cyfatebol) ar raddau 9 i 4 (A* i C), gan gynnwys Saesneg a mathemateg (diploma estynedig)
• Cymhwyster lefel A neu Lefel 3 mewn crefft neu bwnc perthnasol (HNC).

Os ydych chi eisoes yn gweithio fel goruchwyliwr safle ym maes crefftau adeiladu, gallech ddilyn Diploma Lefel 3 NVQ mewn Goruchwylio Gwaith Galwedigaethol i'ch helpu i ddod yn gynllunydd.

• Dod o hyd i gwrs yn eich ardal chi
• Cyngor am gyllid

Prentisiaeth

Mae prentisiaeth gyda chwmni adeiladu’n ffordd dda i ymuno â’r diwydiant. Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

Mae’n cymryd oddeutu dwy flynedd i gwblhau prentisiaeth ganolradd. I ddod yn gynllunydd adeiladu, gallech chi ddilyn prentisiaeth uwch mewn Rheoli Adeiladu.

Bydd angen y canlynol arnoch:

• 2 TGAU neu fwy, neu gymhwyster cyfatebol, ar raddau 9 i 4 (A* i C) (prentisiaeth ganolradd)
• 3 TGAU, neu gymhwyster cyfatebol, ar raddau 9 i 4 (A* i C) (uwch brentisiaeth)
  
  
• Canllawiau i brentisiaethau

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio ym maes adeiladu. Bydd darpar gyflogwyr bob amser yn falch o’ch gweld yn rhestru profiad gwaith ar eich CV.

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel cynllunydd:

• Gwybodaeth am Saesneg, mathemateg a daearyddiaeth
• Gallu gweithio’n dda gydag eraill
• Sgiliau meddwl yn ddadansoddol
• Sgiliau cyfathrebu rhagorol ar lafar
• Dyfalbarhad a phenderfyniad
• Uchelgeisiol ac yn awyddus i lwyddo
• Sgiliau rheoli busnes
• Gallu defnyddio cyfrifiadur a’r prif becynnau meddalwedd yn hyderus

Beth mae cynllunydd yn ei wneud?

Fel cynllunydd, byddwch yn gyfrifol am sicrhau bod prosiectau’n cael eu cadw ar y trywydd iawn drwy baratoi adroddiadau a defnyddio adnoddau rheoli prosiectau i gadw’r holl dimau eraill sy’n ymwneud â’r prosiect ar y trywydd iawn.

Mae swydd cynllunydd yn cynnwys y dyletswyddau canlynol:

• Creu, cynnal ac adolygu rhaglen waith
• Sicrhau bod prosiectau’n cael eu cwblhau'n brydlon ac o fewn y gyllideb
• Cysylltu â syrfewyr, peirianwyr a phenseiri
• Llunio adroddiadau cynnydd a rhagolygon ar gyfer aelodau'r tîm, cleientiaid a rhanddeiliaid
• Rhannu tasgau mawr yn gamau datblygu
• Defnyddio adnoddau rheoli prosiectau i gynllunio amserlenni
• Cydweithio ag amcangyfrifwyr i gyfrifo'r adnoddau sydd eu hangen ar gyfer prosiect
• Cynllunio rhaglenni wrth gefn rhag ofn y bydd amserlenni'n newid
• Cyfarfod â chontractwyr a chyflenwyr
• Dangos gwybodaeth am adeiladu
• Ysgrifennu bidiau am dendrau
• Rheoli nifer o brosiectau gyda chymorth cynllunwyr iau
• Gweithio rhwng swyddfeydd a safleoedd adeiladu.

Faint o gyflog allech chi ei gael fel cynllunydd?

Mae’r cyflog disgwyliedig i gynllunydd yn amrywio wrth i chi gael mwy o brofiad.

• Gall cynllunydd sydd newydd gael ei hyfforddi ennill oddeutu £20,000 - £30,000
• Gall cynllunwyr sydd wedi’u hyfforddi ac sydd â rhywfaint o brofiad ennill oddeutu £30,000 - £50,000
• Gall cynllunwyr uwch, siartredig neu feistr ennill oddeutu £50,000 - £70,000

Mae’r cyflog yn dibynnu ar y lleoliad, y cyflogwr a lefel y cyfrifoldeb, a gall cyflogau ac opsiynau gyrfa wella os bydd gennych statws siartredig.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi gwag diweddaraf ar gyfer cynllunwyr: 

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Mae’r rhan fwyaf o gynllunwyr yn dechrau fel cynorthwywyr neu hyfforddeion cynllunio. Maent yn rhannu rhaglenni gwaith gyda chydweithwyr a chyflenwyr ac yn sicrhau bod pob cam yn cael ei gyflawni yn unol â’r amserlen.

Fel cynllunydd mwy profiadol, gallech symud ymlaen i fod yn uwch-reolwr prosiectau neu'n gyfarwyddwr adeiladu.