Ffurfweithiwr

Gwyliwch y fideo hwn i glywed gan Kit Lippitt am fywyd fel prentis ffurfweithio.

Mae Patrick Diggin yn ffurfweithiwr gyda JP Dunn Construction, contractwr fframiau concrid a gwaith daear arbenigol.

Sut y gwnaethoch ddechrau arni?

Gadewais ysgol yn awyddus i ddysgu crefft ac roeddwn yn ddigon ffodus i gael prentisiaeth fel ffurfweithiwr. Mynychais y Coleg Adeiladu Cenedlaethol yn Bircham Newton yn Norfolk. Roeddwn yn byw yno o ddydd Llun i ddydd Gwener a gwnes ffrindiau da. Roeddwn bob amser yn eithaf da am wneud mathemateg yn yr ysgol ac roedd hynny o fudd gyda'm cwrs. Yn anffodus, bu'n rhaid i'm cwmni cyntaf wneud diswyddiadau ar ôl blwyddyn. Drwy lwc cefais swydd gyda JP Dunn a dyna lle rwyf wedi bod ers hynny.

Beth rydych yn ei hoffi fwyaf am eich gwaith?

Rwy'n dwli ar y ffaith fy mod yn gwneud pethau gwahanol bob dydd am fy mod yn gweithio gyda llawer o bobl wahanol. Rwyf hefyd yn mwynhau dysgu systemau newydd a ffyrdd newydd o weithio.

A beth nad yw gystal?

Yr unig beth nad wyf yn ei hoffi am fy swydd yw'r glaw! Heblaw am hynny rwy'n mwynhau popeth arall am fy rôl ond rwy'n casáu gweithio yn y glaw! Rwy'n hoffi cadw'n weithgar ac mae'r rôl hon yn golygu fy mod bob amser yn brysur sy'n gwneud i'r amser hedfan.

Sut beth yw diwrnod gwaith arferol?

Gall fy rôl newid bob dydd. Un diwrnod gallem fod yn creu mowld lifft a'r diwrnod nesaf gallem fod yn gweithio ar risiau neu waliau bach. Mae'r mowldiau concrid a ddefnyddiwn yn helpu i greu siâp yr adeilad. Mae'n hyfryd gweld fy nghyfraniad at adeiladau nad oeddent yn bodoli gynt.

A oes angen sgiliau penodol arnoch?

Y sgiliau sydd eu hangen yw mathemateg, cyfathrebu da a gwaith tîm. Rwy'n defnyddio mathemateg bob dydd ac rwyf bob amser yn adio, yn tynnu ac yn gweithio ar fesuriadau. Mae angen meddwl chwim o ran mathemateg a geometreg ac rydych hefyd yn dysgu sut i ddefnyddio'r offer sydd eu hangen ar y gwaith. Mae bob amser angen gweithio gydag eraill felly mae'n bwysig cyd-dynnu a chyfathrebu'n glir.

Yr hyn rydych fwyaf balch ohono yn eich gyrfa?

Enillais Wobr Prentis Adeiladu'r Flwyddyn ym mis Hydref 2012 ac rwy'n hynod falch o hynny. Roedd yn braf cael cydnabyddiaeth am fy ngwaith caled. Hefyd enillais wobr Gweithiwr Fframiau'r Flwyddyn a oedd yn brofiad gwych hefyd.

Beth fyddech yn hoffi ei wneud ymhen 10 mlynedd?  

Hoffwn redeg fy nghwmni fy hun. Ond, gwn fod angen i fi fagu llawer o brofiad a gweithio fy ffordd i fyny fel goruchwyliwr, fforman a rheolwr prosiect.

Unrhyw gyngor ar ymuno â'r diwydiant adeiladu?

Ewch amdani! Dyma'r peth gorau rwyf wedi'i wneud. Rwy'n mwynhau fy ngwaith yn fawr ac rwyf wedi cwrdd â phobl wych oherwydd fy ngwaith. Rwyf wedi gwneud llawer o ffrindiau yn y coleg ac yn y gweithle. Mae'n brofiad gwych bod yn brysur iawn, ond yn dal i fwynhau clonc a bach o hwyl ar y safle.