Mae Angus A G Berry yn weithiwr cynaliadwyedd grŵp graddedig yn Mott MacDonald.
Beth mae eich rôl yn ei gynnwys?
Mae fy rôl yn cynnwys cefnogi'r pennaeth cynaliadwyedd byd-eang. Rwy'n gweithio i ysgogi gweithwyr proffesiynol ifanc i arddel cynaliadwyedd drwy'r Rhwydwaith Cynaliadwyedd ar gyfer Rhagoriaeth ymhlith Gweithwyr Proffesiynol Ifanc.
Beth rydych yn ei fwynhau am eich swydd?
Rwy'n mwynhau'r ffaith bod y rôl yn fy ngalluogi i dorri ar draws seilos busnes traddodiadol a rhyngweithio â nifer o randdeiliaid. Rwy'n gweithio ochr yn ochr â rheolwyr cydbractis a'r pennaeth cynaliadwyedd er mwyn arwain cysyniad a strategaeth fusnes rwyf fi'n bersonol yn frwd iawn drostynt.
Sut beth yw eich diwrnod arferol?
Mae fy niwrnod gwaith yn cynnwys rhyngweithio â phobl o bob rhan o'r cwmni. Rwyf mewn cysylltiad â rheolwyr, strategwyr a graddedigion ifanc. Rwy'n gweithio ar nifer o brosiectau ar yr un pryd – o hyrwyddo prosiectau cynaliadwy i weithio ar fentrau busnes newydd.
Pa sgiliau sydd eu hangen arnoch ar gyfer eich swydd?
Gan nad oes gennyf gefndir ym maes peirianneg, bu'n rhaid i mi ddysgu sut i fynegi manteision gweithio mewn modd cynaliadwy gan ddefnyddio iaith y gall pawb yn y busnes ei deall.
Beth oedd eich cefndir cyn dechrau yn y rôl hon?
Cyn ymuno â Mott MacDonald, cyflawnais Radd Meistr mewn Hanes Amgylcheddol ym Mhrifysgol St Andrews, a Gradd BA mewn Hanes o Brifysgol Sussex.
Ble rydych yn gweld eich hun ymhen 10 mlynedd?
Rwy'n credu bod gyrfa ym maes cynaliadwyedd yn fy ngalluogi i ddilyn prosiectau a llwybrau sy'n ymwneud â chyfiawnder cymdeithasol ac amgylcheddol. Ymhen 10 mlynedd, gobeithio y gallaf ddweud fy mod wedi gwneud gwahaniaeth ac y gallaf barhau i wneud gwahaniaeth.
Gair o gyngor i unrhyw un sy'n ystyried gyrfa yn y diwydiant adeiladu?
I unrhyw un sy'n ystyried gweithio ym maes cynaliadwyedd yn y diwydiant adeiladu, byddwn yn awgrymu bod angen ymrwymiad personol cryf i sicrhau newid. Heb awydd cryf i weld newid, gallech gael eich digalonni wrth geisio gwireddu eich uchelgeisiau.
