Peiriannydd deunyddiau

Sut i ddod yn beiriannydd deunyddiau

Mae gwahanol lwybrau i ddod yn beiriannydd deunyddiau. Gallech wneud cwrs prifysgol neu brentisiaeth.

Dylech archwilio'r llwybrau hyn i ganfod pa un yw'r un cywir i chi. Er bod gan rai o'r opsiynau hyn ofynion penodol ynghylch cymwysterau, mae gan lawer o gyflogwyr fwy o ddiddordeb mewn pobl sy'n frwdfrydig, yn fodlon dysgu ac yn gallu dilyn cyfarwyddiadau.

Gallai fod angen cerdyn Cynllun Ardystio Sgiliau Adeiladu (CSCS) arnoch chi i weithio ar safle adeiladu.

Prifysgol

Gallech gwblhau gradd sylfaen neu radd israddedig mewn:

• Peirianneg deunyddiau, mecanyddol, mwyngloddio neu strwythurol
• Gwyddor neu dechnoleg deunyddiau
• Cemeg gymhwysol
• Ffiseg gymhwysol.

Gallech hefyd gwblhau gradd sy'n arbenigo mewn grŵp penodol o ddeunyddiau a'r dulliau i'w defnyddio, megis meteleg, gwyddoniaeth polymer, biodeunyddiau, cerameg a gwydr, neu ddaeareg.

Bydd angen:

• 1 neu 2 lefel A, neu gyfwerth (gradd sylfaen neu ddiploma cenedlaethol uwch)
• 2 i 3 lefel A, neu gyfwerth (gradd israddedig)

Os oes gennych radd israddedig mewn unrhyw beth heblaw peirianneg deunyddiau, efallai y canfyddwch y bydd cymhwyster ôl-raddedig yn agor mwy o gyfleoedd.

Os yw eich gradd yn cael ei hachredu gan gorff proffesiynol perthnasol, megis y Sefydliad Deunyddiau, Mwynau a Mwyngloddio, gall eich helpu i gyflawni statws peiriannydd siartredig yn nes ymlaen.

• Eglurhad o'r gofynion mynediad cyfatebol
• Dod o hyd i gwrs prifysgol
• Cyngor am gyllid

Prentisiaeth

Mae prentisiaeth gyda chwmni adeiladu yn ffordd dda i mewn i'r diwydiant.

Mae prentisiaethau yn agored i bawb dros 16 oed. Fel prentis, byddwch yn cael eich cyflogi'n llawn gan eich cwmni a disgwylir i chi weithio isafswm o 30 awr yr wythnos. Bydd eich amser yn cael ei rannu rhwng profiad yn y swydd a choleg neu ddarparwr hyfforddiant.

Efallai y byddwch yn gallu gwneud gradd brentisiaeth Technolegydd Gwyddor Deunyddiau.

Fel rheol bydd arnoch angen:

• 4 neu 5 TGAU ar raddau 9 i 4 (A* i C) a lefelau A, neu gyfwerth (gradd brentisiaeth).
  
  
• Canllawiau i brentisiaethau

Profiad gwaith

Mae profiad gwaith yn hanfodol i ennill cyflogaeth o fewn y diwydiant adeiladu. Gallech ennill hwn yn yr ysgol, neu wrth weithio ar benwythnosau ac yn ystod y gwyliau gyda chwmni neu berthynas sy'n gweithio ym maes adeiladu. Bydd darpar gyflogwyr bob amser yn falch o weld profiad gwaith wedi'i restru ar eich CV.

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel peiriannydd deunyddiau:

• Gwybodaeth am wyddoniaeth peirianneg, mathemateg, ffiseg, a thechnoleg
• Gwybodaeth am gemeg gan gynnwys sut i ddefnyddio a gwaredu cemegau'n ddiogel
• Sgiliau meddwl yn ddadansoddol
• Gwybodaeth am weithgynhyrchu, cynhyrchu a phrosesau
• Sgiliau cyfathrebu rhagorol ar lafar
• Gweithio’n drylwyr a rhoi sylw i fanylion
• Gallu cyflawni tasgau sylfaenol ar gyfrifiadur neu ddyfais yn y llaw

Beth mae peiriannydd deunyddiau yn ei wneud?

Fel peiriannydd deunyddiau byddwch yn gyfrifol am archwilio priodoleddau'r deunyddiau amrywiol a ddefnyddir ar gyfer prosiectau adeiladu, ac yna'n dewis y gorau yn seiliedig ar y canfyddiadau hyn.

Mae swydd peiriannydd deunyddiau'n cynnwys y dyletswyddau canlynol:

• Ymchwilio i briodoleddau deunyddiau
• Dewis y deunyddiau gorau at ddibenion penodol, h.y. ysgafnaf, mwyaf gwydn
• Profi deunyddiau o dan amgylchiadau gwahanol i asesu pa mor wrthsafol ydyn nhw, h.y. i wres, cyrydiad neu ymosodiad cemegol
• Dadansoddi data profion deunyddiau gan ddefnyddio meddalwedd modelu
• Ymchwilio i faterion strwythurol a chynghori ar gynnal a chadw ac atgyweirio deunyddiau
• Cyfrifo costau deunydd a chynghori ar y cynhyrchion gorau i'w defnyddio
• Ysgrifennu adroddiadau ar gyfer peirianwyr a rheolwyr prosiect
• Datblygu prototeipiau adeiladu
• Ystyried effaith gwastraff/amgylcheddol sy'n deillio o ddefnyddio deunyddiau
• Gweithio mewn ffatri weithgynhyrchu, labordy neu swyddfa.

Faint allech chi ei ennill fel peiriannydd deunyddiau?

Mae’r cyflog disgwyliedig i beiriannydd deunyddiau'n amrywio wrth i chi gael mwy o brofiad.

• Gall peiriannydd deunyddiau sydd newydd ei hyfforddi ennill £20,000 - £25,000
• Gall peiriannydd deunyddiau ag ychydig o brofiad ennill £25,000 - £40,000
• Gall peirianwyr deunyddiau uwch, siartredig neu feistr ennill £40,000 - £65,000.*

Mae'r oriau a'r cyflog yn dibynnu ar y lleoliad, y cyflogwr ac unrhyw oramser y gallech ei wneud.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi gwag diweddaraf ar gyfer peirianwyr deunyddiau:

• Jobsite

Gan mai gwefannau allanol yw'r rhain, gall nifer y swyddi gwag sy'n gysylltiedig â'ch rôl ddewisol amrywio. Bydd cyfleoedd newydd yn cael eu postio wrth iddynt godi.

Llwybr gyrfa a chamu ymlaen

Gyda phrofiad, gallech symud ymlaen i fod yn uwch beiriannydd deunyddiau ac ennill cyflog uwch.

Neu, gallech arbenigo a dod yn arbenigwr mewn deunydd penodol, neu gallech chi ddod yn rheolwr prosiect neu'n beiriannydd sifil neu strwythurol.

Gallech sefydlu eich busnes eich hun a gweithio fel ymgynghorydd deunyddiau llawrydd.