Peiriannydd gwasanaethau adeiladu

Sut i fod yn beiriannydd gwasanaethau adeiladu

Gallwch fynd i'r swydd hon drwy amrywiaeth o lwybrau, gan gynnwys cwrs prifysgol neu goleg, prentisiaeth, neu hyfforddiant yn y gwaith.

Dylech chi ymchwilio i’r llwybrau hyn i fod yn ddelweddwr 3D, i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau. 

Efallai y bydd angen cerdyn Cynllun Ardystio Sgiliau Adeiladu arnoch i weithio ar safle adeiladu.

Prifysgol

Gallech ddod yn beiriannydd gwasanaethau adeiladu drwy astudio ar gyfer gradd sydd wedi’i hachredu gan Sefydliad Siartredig y Peirianwyr Gwasanaethau Adeiladu (CIBSE). Dyma rai pynciau perthnasol:

• Peirianneg gwasanaethau adeiladu
• Peirianneg bensaernïol
• Gwasanaethau adeiladu a pheirianneg fecanyddol
• Peirianneg drydanol
• Adeiladu a’r amgylchedd adeiladu
• Adeiladu cynaliadwy 

Ar gyfer gradd israddedig, bydd angen y canlynol arnoch fel arfer:

• 5 TGAU ar raddau 9 i 4 (A* i C), neu gymhwyster cyfatebol, gan gynnwys Saesneg, mathemateg a gwyddoniaeth
• 2 i 3 Lefel A, neu gyfwerth.

• Eglurhad o’r gofynion mynediad cyfatebol
• Dod o hyd i gwrs prifysgol
• Cyngor am gyllid

Coleg

Gallech ddilyn cwrs yn eich coleg lleol a fyddai'n eich galluogi i ymuno â chwmni fel peiriannydd gwasanaethau adeiladu dan hyfforddiant. Dyma rai cyrsiau o’r fath:

• Lefel T mewn Dylunio, Syrfeo a Chynllunio
• Diploma Cenedlaethol Uwch (HND) mewn Gwasanaethau Adeiladu, neu Beirianneg Fecanyddol a Thrydanol.

Efallai y bydd angen y canlynol arnoch:

• 4 - 5 TGAU ar raddau 9 i 4 (A* i C), neu gymhwyster cyfatebol, gan gynnwys Saesneg a mathemateg (lefel T)
• 1 neu 2 Lefel A, neu gyfwerth (HND).

• Eglurhad o’r gofynion mynediad cyfatebol
• Canllaw i lefelau T
• Dod o hyd i gwrs yn eich ardal chi
• Cyngor am gyllid 

Prentisiaeth

Gallech chi gwblhau prentisiaeth uwch ar gyfer technegwyr peirianneg gwasanaethau adeiladu neu beirianwyr rheolaethau rheoli ynni adeiladau. Gallech chi hefyd gwblhau gradd-brentisiaeth peiriannydd dylunio gwasanaethau adeiladu. 

Bydd angen i chi gael 5 TGAU ar raddau 9 i 4 (A* i C), neu gymhwyster cyfatebol ar gyfer uwch brentisiaeth neu radd-brentisiaeth.

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

• Canllawiau i brentisiaethau

Gwaith

Efallai y gallwch chi ddod o hyd i waith fel technegydd gwasanaethau adeiladu a chwblhau cymwysterau yn y gwaith, neu’n rhan-amser gyda darparwr hyfforddiant i ddod yn beiriannydd gwasanaethau adeiladu.

Efallai y bydd modd i chi wneud cais yn uniongyrchol am swydd fel peiriannydd gwasanaethau adeiladu os oes gennych chi rywfaint o brofiad ym maes peirianneg. Mae cyflogwyr yn gwerthfawrogi profiad peirianneg perthnasol o ddiwydiannau eraill yn fawr. Byddai parch mawr yn cael ei roi i sgiliau mewn peirianneg drydanol, fecanyddol, amgylcheddol, acwstig neu bŵer.  

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel peiriannydd gwasanaethau adeiladu. Bydd darpar gyflogwyr bob amser yn falch o’ch gweld yn rhestru profiad gwaith ar eich CV. 

• Dysgwch fwy am brofiad gwaith

Sgiliau 

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel peiriannydd gwasanaethau adeiladu: 

• Gwybodaeth am wyddoniaeth a thechnoleg peirianneg
• Gwybodaeth am Fathemateg
• Sgiliau meddwl yn ddadansoddol
• Sylw da i fanylion
• Sgiliau cyfathrebu rhagorol ar lafar
• Dealltwriaeth o adeiladu
• Y gallu i weithio ar eich liwt eich hun

Beth mae peiriannydd gwasanaethau adeiladu yn ei wneud?

Fel peiriannydd gwasanaethau adeiladu, byddwch yn gyfrifol am amryw o dasgau sy’n ymwneud â chynllunio, dylunio, monitro ac archwilio systemau mewn adeiladau fel swyddfeydd, cartrefi ac ysbytai. Gallech fod yn treulio amser yn gweithio mewn swyddfa, neu ar y safle. 

Mae swydd peiriannydd gwasanaethau adeiladu yn cynnwys y dyletswyddau canlynol: 

• Cynllunio, dylunio, monitro ac archwilio systemau 
• Cynghori cleientiaid a phenseiri ar faterion sy’n ymwneud â gwasanaethau adeiladu
• Negodi a datblygu contractau prosiect a chytuno ar y rhain gyda chleientiaid
• Gwneud penderfyniadau ynghylch cylch oes offer systemau presennol a lleoliad priodol offer newydd
• Dylunio systemau gyda chymorth meddalwedd dylunio â chymorth cyfrifiadur
• Rheoli a rhagweld gwariant a sicrhau bod y gwaith yn cadw at y gyllideb
• Dylunio offer sy’n benodol i’r safle yn ôl yr angen
• Comisiynu, trefnu ac asesu gwaith contractwyr
• Arolygu a goruchwylio’r gwaith o osod systemau adeiladu a nodi gweithdrefnau cynnal a chadw a gweithredu
• Monitro systemau a phrosesau adeiladu
• Sicrhau bod dyluniad a systemau cynnal a chadw adeilad yn bodloni gofynion deddfwriaethol ac iechyd a diogelwch
• Cwrdd â gwneuthurwyr cynnyrch adeiladu i ddysgu am y cynnyrch diweddaraf
• Asesu hyd oes adeiladau a’u gwasanaethau cydrannol er mwyn lleihau’r adnoddau a ddefnyddir a’r effaith ar yr amgylchedd. 

Faint o gyflog allech chi ei gael fel peiriannydd gwasanaethau adeiladu?

Mae’r cyflog disgwyliedig i beiriannydd gwasanaethau adeiladu yn amrywio wrth i chi gael mwy o brofiad.

• Gall peiriannydd gwasanaethau adeiladu sydd newydd eu hyfforddi ennill £24,000 - £27,000
• Gall peiriannydd gwasanaethau adeiladu hyfforddedig gyda pheth profiad ennill £27,000 - £35,000
• Gall uwch beirianwyr gwasanaethau adeiladu ennill £35,000 - £50,000.*

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi diweddaraf ar gyfer peirianwyr gwasanaethau adeiladu: 

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel peiriannydd gwasanaethau adeiladu, gallech chi ennill profiad a symud i uwch dîm rheoli prosiectau, arolygu meintiau, neu ddylunio peirianneg. Gallech chi hefyd weithio fel ymgynghorydd.

Ar ôl i chi gymhwyso’n llawn, gallech chi wneud cais am statws siartredig i Sefydliad Siartredig y Peirianwyr Gwasanaethau Adeiladu (CIBSE) neu sefydliad peirianneg adeiladu arall sydd wedi’i drwyddedu gan y Cyngor Peirianneg. Byddai hyn yn gwella eich rhagolygon swydd, ac yn eich helpu i symud ymlaen yn eich gyrfa.