Gosodwr lloriau

Sut i fod yn osodwr lloriau

Mae’r rhan fwyaf o osodwyr lloriau’n dechrau drwy ddilyn prentisiaeth a hyfforddi yn y gwaith. Dylech chi ymchwilio i’r llwybrau hyn i fod yn osodwr lloriau i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Coleg/darparwyr hyfforddiant

Efallai y bydd eich coleg neu'ch darparwr hyfforddiant lleol yn cynnig cyrsiau a fydd yn eich helpu i ddechrau ar yrfa fel gosodwr lloriau. Gallech chi astudio ar gyfer Dyfarniad Lefel 1 mewn Gweithrediadau Lloriau neu Sgiliau Adeiladu Sylfaenol gydag opsiynau gosod lloriau, neu Ddiploma NVQ Lefel 2 neu 3 mewn Gorchuddio Lloriau.

Gallech chi hefyd astudio cyrsiau byr a ddarperir gan Gymdeithas Hyfforddi'r Diwydiant Lloriau (FITA), y Gymdeithas Gosod Lloriau ar Gontract (CFA), y Sefydliad Cenedlaethol ar gyfer Gosodwyr Carpedi a Lloriau (NICF) ac Academi Loriau’r DU.

Yn gyffredinol, bydd angen y canlynol arnoch:

• 2 TGAU neu lai ar raddau 3 i 1 (D i G) (cwrs lefel 1)
• 2 TGAU neu fwy ar raddau 9 i 3 (A* i D) (cwrs lefel 2).

Gall gweithwyr mwy profiadol uwchsgilio drwy’r llwybr Asesu a Hyfforddi ar y Safle (OSAT).

• Eglurhad o’r gofynion mynediad cyfatebol
• Dod o hyd i gwrs yn eich ardal chi
• Cyngor am gyllid

Prentisiaeth

Mae prentisiaeth gyda chwmni adeiladu’n ffordd dda i ymuno â’r diwydiant. Gallech chi gwblhau prentisiaeth ganolraddol fel gosodwr lloriau.

Bydd angen i chi gael 2 - 3 TGAU ar raddau 9 i 4 (A* i C), neu gymhwyster cyfatebol.

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

• Dod o hyd i brentisiaeth yn eich ardal chi
• Canllawiau i brentisiaethau

Gwaith

Os oes gennych chi rywfaint o brofiad sylfaenol, gallech chi wneud cais yn uniongyrchol i gwmni gosod lloriau arbenigol i gael profiad ar safle fel gosodwr lloriau. Gallech chi ddechrau arni fel cynorthwyydd i osodwr lloriau mwy profiadol a symud ymlaen wrth i’ch galluoedd wella.

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel gosodwr lloriau. Bydd darpar gyflogwyr bob amser yn falch o’ch gweld yn rhestru profiad gwaith ar eich CV.

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel gosodwr lloriau:

• Gwasanaeth gwych i gwsmeriaid
• Gallu gweithio’n dda ar eich pen eich hun a chydag eraill
• Sgiliau cyfathrebu
• Gwybodaeth dda am fathemateg.

Beth mae gosodwr lloriau yn ei wneud?

Fel gosodwr lloriau, gallech chi fod yn:

• Mesur arwynebedd y llawr
• Cyfrifo’r deunyddiau sydd eu hangen
• Paratoi’r sail a gosod isloriau pan fo angen
• Clirio dodrefn a thynnu drysau i ffwrdd
• Codi’r hen lawr
• Glanhau, lefelu a selio’r ardal waith
• Gludo neu hoelio haen waelodol yn ei lle
• Gosod gorffeniad terfynol y llawr.

Faint o gyflog allech chi ei gael fel gosodwr lloriau?

Mae’r cyflog disgwyliedig i osodwr lloriau yn amrywio wrth i chi gael mwy o brofiad.

• Gall gosodwyr lloriau sydd newydd gael eu hyfforddi ennill £17,000 - £20,000
• Gall gosodwyr lloriau hyfforddedig gyda pheth brofiad ennill £20,000 - £30,000*
• Gall gosodwyr lloriau uwch, siartredig neu feistr ennill £30,000 - £35,000*
• Gosodwyr lloriau hunangyflogedig sy’n gosod eu cyfraddau cyflog eu hunain.

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud.

* Mae cyflogau wedi’u casglu o sawl ffynhonnell o’r diwydiant ac wedi’u diweddaru ers 2019

Edrychwch ar y swyddi gwag diweddaraf ar gyfer gosodwyr lloriau:

• Contract Flooring Journal
• Indeed
• Totaljobs

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Gyda phrofiad, gallech gamu ymlaen i fod yn oruchwyliwr tîm, yn amcangyfrifwr neu’n rheolwr contractau.

Gallech chi symud i feysydd fel prynu a gwerthu cynnyrch.

Gallech chi hefyd ddechrau eich busnes eich hun yn gosod carpedi a lloriau neu weithio fel is-gontractwr.