Ymgynghorydd Treftadaeth

Sut i fod yn ymgynghorydd treftadaeth

Mae sawl ffordd o ddod yn ymgynghorydd treftadaeth. Gallech gwblhau cwrs prifysgol neu goleg, prentisiaeth neu wneud cais am waith yn uniongyrchol i gyflogwr.

Dylech ymchwilio i’r llwybrau hyn i fod yn ymgynghorydd treftadaeth i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Prifysgol

Mae nifer o gyflogwyr yn chwilio am ymgeiswyr sydd â gradd ôl-raddedig berthnasol fel rheoli treftadaeth neu gadwraeth hanesyddol, a phrofiad gwaith yn y sector treftadaeth

Darganfyddwch beth yw'r gofynion mynediad lle rydych chi'n byw.

• Eglurhad o’r gofynion mynediad cyfatebol
• Dod o hyd i gwrs prifysgol
• Cyngor am gyllid 

Coleg/darparwyr hyfforddiant

Gallech chi gwblhau cwrs adeiladu, hanes, astudiaethau amgylcheddol neu arolygu, ac yna cwblhau hyfforddiant arbenigol pellach i fod yn ymgynghorydd treftadaeth.

Darganfyddwch beth yw'r gofynion mynediad lle rydych chi'n byw.

• Eglurhad o’r gofynion mynediad cyfatebol
• Dod o hyd i gwrs yn eich ardal chi
• Cyngor am gyllid

Prentisiaeth

Gallech chi gwblhau prentisiaeth cynorthwyydd cyngor amgylchedd hanesyddol i fod yn ymgynghorydd treftadaeth. Bydd yn cymryd dwy flynedd i’w gwblhau hyn.

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

Darganfyddwch beth yw'r gofynion mynediad lle rydych chi'n byw.

• Canllawiau i brentisiaethau

Gwaith

Os oes gennych brofiad neu sgiliau perthnasol ym maes rheoli prosiectau adeiladu, pensaernïaeth, cynllunio awdurdod lleol neu gynnal arolygon ar adeiladau, efallai y gallwch wneud cais yn uniongyrchol i gyflogwr am swydd fel ymgynghorydd treftadaeth.

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel ymgynghorydd treftadaeth. Bydd darpar gyflogwyr bob amser yn falch o’ch gweld yn rhestru profiad gwaith ar eich CV. Mae llawer o fudiadau diwylliannol yn cynnig cyfleoedd i wirfoddoli a fydd yn rhoi blas i chi ar waith treftadaeth, ac yn datblygu eich sgiliau a'ch cysylltiadau.

• Dysgwch fwy am brofiad gwaith

Sgiliau

Dyma rai o’r sgiliau sy’n ddymunol ar gyfer rhywun sy’n ystyried gyrfa fel ymgynghorydd treftadaeth: 

• Brwdfrydedd dros safleoedd ac adeiladau hanesyddol
• Sgiliau ymchwil rhagorol
• Gallu rheoli eich amser a chwrdd â therfynau amser.
• Sgiliau cyfathrebu cadarn
• Gwybodaeth am hanes pensaernïol
• Agwedd drefnus a methodolegol at waith

Cymwysterau

Beth mae ymgynghorydd treftadaeth yn ei wneud?

Mae ymgynghorydd treftadaeth yn cynghori ar waith adeiladu sydd i fod i ddigwydd mewn adeilad neu leoliad hanesyddol, fel y gellir cadw safleoedd o bwysigrwydd diwylliannol neu hanesyddol sylweddol am genedlaethau i ddod.

Mae dyletswyddau ymgynghorydd treftadaeth yn cynnwys: 

• Archwilio safleoedd a strwythurau hanesyddol i asesu gofynion prosiectau
• Ymchwilio i hanes safleoedd treftadaeth ac adeiladau hanesyddol
• Ystyried gofynion a rheoliadau adeiladu modern wrth gynllunio gwaith newydd
• Darparu cyngor technegol i reolwyr adeiladu, penseiri, cadwraethwyr a chleientiaid
• Dod o hyd i ddeunyddiau adeiladu a gosodiadau traddodiadol neu brin
• Ymchwilio i liwiau, deunyddiau a gorffeniadau paent gwreiddiol
• Recriwtio a goruchwylio crefftwyr arbenigol i wneud gwaith adfer ac adnewyddu
• Diogelu ac ymgorffori nodweddion treftadaeth yn y gwaith o adnewyddu neu adfer yr adeilad
• Cynhyrchu cynlluniau ac adroddiadau ar gyfer cleientiaid ac uwch reolwyr
• Ymateb i ymholiadau gan y cyhoedd ac ymwelwyr
• Adolygu cynlluniau adeiladau a dogfennau hanesyddol
• Gweithio ar y safle ac mewn swyddfa.

Faint o gyflog allech chi ei gael fel ymgynghorydd treftadaeth?

Mae’r cyflog disgwyliedig i ymgynghorydd treftadaeth yn amrywio wrth i chi gael mwy o brofiad.

• Gall ymgynghorydd treftadaeth sydd newydd gymhwyso ennill £17,000 - £25,000
• Gall ymgynghorwyr treftadaeth hyfforddedig gyda pheth brofiad ennill £25,000 - £40,000
• Gall ymgynghorwyr treftadaeth uwch, siartredig neu brif ymgynghorwyr treftadaeth ennill £40,000 - £60,000.*

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud. Gallai cyflogau wella os bydd gennych statws siartredig. 

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi diweddaraf ar gyfer ymgynghorwyr treftadaeth: 

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel ymgynghorydd treftadaeth, gallech symud ymlaen i rôl uwch a dod yn rheolwr prosiectau treftadaeth.

Gallech weithio i gwmni adeiladu, awdurdod lleol, practis pensaernïol, neu sefydlu eich hun fel ymgynghorydd treftadaeth hunangyflogedig.